Haurren eta gazteen irakurzaletasuna bultzatzeko xedez urtero antolatzen duen ‘Ipuin eta ilustrazio lehikaeta’ aurkeztu du gaur Donostian Elkar Fundazioak. Zazpigarren edizio honetan, J.M. Olaizola ‘Txiliku’-k idatzitako ipuin labur bat eta Joseba Beramendik egindako ilustrazio bat dira oinarri. Parte-hartzaileek ipuina ilustratu beharko dute edo ilustrazioa ipuin bilakatu. Bi modalitate hauek haurren adinen arabera antolatu dira. Ipuina ilustratuko dutenen artean hiru maila daude: batetik Haur Hezkuntzako 4 eta 5 urteko haurrak, eta bestetik Lehen Hezkuntzako 1. zein 2. mailakoak, bi kategoriatan banatuta. Bestalde, ipuina idazteko aukera Lehen Hezkuntzako 6. mailako haurrek eta DBH-ko maila guztietako gazteek izango dute.
Sariei dagokienez, ilustrazio modalitateko irabazleek Milan T2 Tableta bat, pintura-estutxe bat eta Elkar-eko opari txartel bat lortuko dute. Ipuinen arloko sariak BQ Edison tableta bat eta opari txartel bat dira. Lanak aurkezteko epea gaur ireki da eta apirilaren 15era arte iraungo du.